اهڙو مامرو يا حاصلات جنهن کي مَٽائي يا پوئتي نه ڪري سگهجي . مثال طور ڪو به سگهارو ملڪ يا ڪجهه اتحادي ملڪ گڏجي اوچتو اهڙو فيصلو يا ڪم ڪن ، جنهن سان آسپاس جي علائقن ۾ معمول مطابق هلندڙ معاملا متاثر ٿين ، ته ان کي اڻ ٽر صورتحال (Fait Accompli) جي اصطلاح سان سڃاتو وڃي ٿو. اهڙي فيصلي يا ڪم ۾ گهڻي قدر نقصان ٿيڻ جا امڪان هوندا آهن. Fait Accompli جو وڏو مثال اپريل 1982ع ۾ ارجنٽائين طرفان ڏکڻ ائٽلانٽڪ سمنڊ ۾ موجود فاڪلئنڊ ٻيٽن تي ، اوچتو قبضو ڪرڻ وارو قدم آهي . انهن ٻيٽن تي برطانيا جو 1833ع کان قبضو هو. پر ارجنٽائين انهن ٻيٽن تي (جاگرافيائي لحاظ کان ويجهو هُئڻ ڪري) پنهنجو حق ڄمائڻ ٿي چاهيو. اِن بحران دوران ڳالهين منجهان ڪو فائدو نه ڏسي، ارجنٽائين 14،000 فوجين جي طاقت سان اوچتو فاڪ لئنڊ ٻيٽن تي قبضو ڪيو. برطانيا، بين الاقوامي سطح تي ڪوششون وٺڻ سان گڏ جوابي فوجي طاقت استعمال ڪندي ، ارجنٽائين کان جون 1982ع ۾ قبضو واپس ڇڏائي ورتو. اِن هار سبب ارجنٽائين جي ساک کي تمام گهڻو نقصان پهتو. مبصرن جو چوڻ آهي ته ٻنهي ڌُرين جي طاقت کي نظر ۾ رکندي، ارجنٽائين کي نقصان کائڻ کان سواءِ ڪو چارو نه هُو ۽ ان صورتحال جو ٽرڻ ناممڪن هُو